اِے منی پَلَشتگیں زِند ءَ سر ءُ سامان کَنت
اَلّم ءَ روچے نہ روچے مھروان ئے دَر کپیت
گران بھاھیں دوستی ءُ مِھراں پَدا اَرزان کَنت
دِل سَتَر درد ءُ گَماں پولِنگ کُتگ سوتکگ بلے
ھمدل ءِ دَر کَیت دِل ءَ پَلگاری جی ءُ جان کَنت
مُشکلیں کاراں اگاں دم توس کُتگ مارا مُدام
دِلجَماں پیداک بیت یارے مُُشکلاں آسان کَنت
چَہ گُل ءِ اَلک ءَ دَرِتکگ پَمن ءَ یک کاسِد ءِ
گوں گُل ءِ نِمدی کاسِد کوہ ءُ کَنڈَگاں دِران کَنت
مئے اُمیت ءِ باگ اگاں تَبد ءُ لِواراں آس جَتگ
چَہ گُل ءِ الک ءَ جَمبَرے کِیت ءُ اِدا شَنزان کَنت
پَد منی مرگ ءَ من ءَ زِندگ کَن اَنت شائر گُلیں
پہ منی یات ءَ اَمُل شئر ءُ گَزَل بندان کَنت
رَند چہ رِند ءَ نام رِند ءِ ھَر زُبان ءَ پَشکَپیت
اِے دویں گالاں منی راج اَلَم ءَ وانان کَنت
ھتم ءَ کہ وھد ءِ گُل چِنے گِلہ ءَ مہ کَن چہ کُنٹگاں
بھارگاہ ءَ ھم کُنٹگ ردیت چَہ کَنٹگاں گُل سِستگاں
چو بُلبُل ءَ پریات کناں رازاں گوں گُل دْرشان کناں
گُل من ترا جی جان کناں دستونک آں پَتو بَستگاں
من شے تو چوں ھانی ءَ دل دات پہ تو اَرزانی ءَ
سر تئی سرا کُربانی ءَ بے تو کہ زِند ءَ مُرتگاں
اَے بزگیں ماتیں وتن چَہ دُژمناں گلہ ءَ مہ کَن
مُلا ئے واستہ مُرتگن، تئی پُسَگاں کہ پَد مَنتگاں
سولیں کھیر ءَ بیا بدے مِستاگ ھور ءُ جمبرے
تبد ءُ لِواراں نوں بُرے من گوں کھیر ءَ نِشتگاں
بیا مئے بھارگاہ ءَ بِچار ویرندانی ءَ کُرتگ چو ھار
دل ریش ءُ داٰئم بے کرار لاچار ءُ مجبور کَپتگاں
ماتیں وتن پَسَگ تئی بیا ھُشک کَن اَنت ھیداں تئی
دُرستیں گم ءُ دردوں وتی، من گوں شرابءَ شُشتگاں
کاینت منی کَبرے سرا گریونت روچے سَد برا
نالیت گُشیت رند تو دَرا، بِل اِت کہ سَھتے وپتگاں
رند بلوچ
نالگ ایں بلبل گل وپادری نہ زاناں
گُل گُشیت گوں کُنٹگاں یاری نہ زاناں
دل چُشیں گموار زنگءَ جَت نہ کَنت
اے ھما گمواراں گمواری نہ زاناں
زار بئے کایاں ترا وشاں کناں
من میاریگاں کہ من زاری نہ زاناں
تو گوں دْزگْوھاراں جنے زنگ ءَ منی
من گَناھکاراًں کہ گِلگداری نہ زاناں
تئی جُدائی ءَ مُدام اپارگ اِنت دل
بَس ھَمیں پریات ءُ وازاری نہ زاناں
من چَہ کاپِر ھِچ نہ دیستگّ ھِچ بدی
اِے مُسلماناں کہ دینداری نہ زاناں
زاھریں مَستانگ ءُ یک رنگ کہ ما
تئی وڑ ءَ مُلا ریاکاری نہ زاناں
جنت شِگان ءَ ءُ گُشیت دیوانگ ءِ رند
چی کناں دیوانگاں ساری نہ زاناں
رند بلوچ
کِسّہ ئے شھدیں زَیم من دَرشان کناں
ھانُل ءِ یات ءَ مَرچی من دیوان کناں
یات کناں مرچی ھانُل ءَ گالانی تہ ءَ
گوشدار اِت او ھَمبلاں شھدیں کِسّہ ءَ،
چَہ وتی کُلّ ءَ پُلّیں وَرنا ئے درکَپیت
دیم پَما سَبزیں کھچَر ءُ باگاں سر بہ بیت
سَیلّ کنان اَت آ پُرمڑا داریں شاھوکار
شاتُلاں وَشیں کُوکُوے سر داتَگ توار
آ گُلیں وَرنا گوں مَلاری ءَ جُنزگ اَت
شِیشگیں جوے پُلّیں وَرنا ءَ دیستگّ اَت
جوسر ءَ نِشتَگ دْروشُمی ماہ ئے کیگَدیں
دست ءُ دیم شُشتَگ، شِنگِتگ بویے دِلکشیں
دیست وَرنا ءَ گُشتی او ماھرنگیں پَری
بے ترا گْران اِنت پَمّن ءَ کُلّ ءَ واتری
شِرکنیں رَکاں لوٹاں تئی شرَنگیں جَنّک
آ گُل ءَ درّائینت، بَس او گُھواریں بَچکّ،
- اَنگریں آسے باں ترا سوچاں پُر کناں
بَچکّ- سارتُکیں آپ ئے باں کُشاں آس ءَ تَر کناں
جَنّک- کُچّلیں زھرئے باں تئی نُکّ ءَ زھر کناں
بَچکّ- شھدیں بینَگ باں زھری ءَ بے زار کناں
جَنّک- تیز سگارے باں من ترا چُنڈ چُنڈ کناں
بَچکّ- مُہکَمیں کوہ باں اَچ سَگار تیز ءَ کُنٹ کناں
جَنّک- تَپتَگ ایں پَٹّ ئے باں ترا سوچاں ھَر دمان
بَچکّ- نود باں گوراں تَپتَگ ایں پَٹّ ءَ بے اَمان
جَنّک- کُنٹَگ ئے باں من جوسری راھانی سر ءَ
بَچکّ- دور سَریں ھارے باں ترا روپاں یکبَر ءَ
جَنّک- جَوریں دردے باں تئی دِل ءَ دِران کناں
بَچکّ- من تَبیب ئے باں جَوریں درد درمان کناں
جَنّک- من زِری نودے باں ھَما آزمان ءَ رَواں
بَچکّ- تُرندیں زِرگوات باں من ترا زوران ءُ رَواں
جَنّک- بُرزیں درچکے باں من ھَما گیابان ءُ لَداں
بَچکّ- بالی ایں مُرگے باں تئی شاھاں لَیب کناں
جَنّک- ھانُل ئے باں من آب باں گالانی تہ ءَ
بَچکّ- سید زَھورشاہ باں پَٹ ءُ پول آبانی تہ ءَ
جَنّک- رِتکَگّیں آپ ئے باں رَواں پُلکانی تہ ءَ
بَچکّ- من زمین ھُشکیں باں ترا کَشاں اَندر ءَ
.
بَچکّ- ھُدوکاں من پہ تَو سَک بے کراراں
- مِراں مں داں ترا دست ءَ مَیاراں
- کہ لوٹاں لِزتاں شھد ایں تئیگاں
- نہ باں بے تَو کہ تئی ھُسن ءِ شِکاراں
.
جَنّک- مہ جیڑ دِلبر دِل ءَ تئی بانور باں من
- گوں شھدیں لِزّتاں تئی ھُور باں من
- تَو سُور ءِ کِلہ ءَ بَند ءُ پہ من بیا
- کناں آروس گوں تَو ھور باں من
✍ زَیم بلوچ
پَتو ماتیں وتن نوں من سرگِپتگاں
پہ تئی آجُوئی مرگ ءَ سرگْوستگاں
مَکر مُلّاے وھدے کہ شَر زانتَگاں
نی گُلامی ءِ زمزیلّ من سِںستگاں
دیریں بَندیگ ءُ دِگرے نَپَر بوتگاں
گْرانیں واب ءَ چِہ نوکی ماں پادَتگاں
جَوریں جَورے سر ءَ بینَگ ءَ بستَگ اَت
راج ءَ رَدوا کہ آ بینَگ اِش وارتگ اَت
شال مانپوش اِتگ واجکار ءَ پہ وت
برھنَگیں راج گوں مُلّا نہ اِنت گیش وت
جُھد پہ سرڈگار ءَ اِبابَت منی
کُل بلوچ ءِ تِپاکی اِنت ھاجَت منی
آجُوے رُژن کَندیل ءَ زیارت کناں
یا چو بالْو سُچاں یا پہ رُژن ءَ رَساں
چہ منی سَرڈگار ءَ نہ روپ اِت نوں باج
باج اَسکندر ءَ ھِچ نہ بُرتگ گوں تاج
نہ من پُرشتگیں داریوشاں ءُ نہ کورُشاں
چاکرے پُسّگاں شیریں، لَشکَر کُشاں
آجُوے بُرتگیں بند ءَ بنداں نوں من
وژدِلی گوں وتی راج ءَ نِنداں نوں من
ھُشک ءُ تَبدانی رَند ءَ بھارے ھَم ھَست
کِشتگیں دان توم ءَ کِشارے ھَم ھَست
کَوش شیزار اِیت بندانی آپ سارت بَنت
تُنّی ایں درچک نوش اَنت ءُ آبات بَنت
تیوگیں پَنتے داتگ من ءَ پیرُک ءَ
آ پہ راج ءَ نہ بیت تئی نہ بیت تیوک ءَ
شھدیں اَلھان وان اَنت پہ ھانُل کُلی
آسُمی پُلّ ءِ آتار مئے ھوش ءَ پُلی
شائراں جاہ جَتگ پَہ وتی ھانُل ءَ
چوں کُلی بوتگ اَنت پَہ وتی آ گُل ءَ
نَد کہ جُنز اِیت ءُ دِل گالاں کتار کَنت
گال ءُ گُپتار دِل ءِ زَیم تئی یاتگار بَنت
زَیم بلوچ
درباره این سایت